அமெரிக்காவிற்கும் ஈரானுக்கும் இடையே மூண்டுள்ள போர் பதற்றங்களுக்கு மத்தியில், வத்திக்கான் (Vatican) தலைவருக்கும் வெள்ளை மாளிகைக்கும் இடையிலான வார்த்தைப் போர் புதிய உச்சத்தை எட்டியுள்ளது. “ஒரு சில சர்வாதிகாரிகளின் பிடியில் சிக்கி இந்த உலகம் சீரழிந்து கொண்டிருக்கிறது” என்று போப் லியோ XIV (Pope Leo XIV) கடுமையாக விமர்சித்துள்ளார்.
ஆதிக்க சக்திகளுக்கு போப் விடுத்த எச்சரிக்கை
தற்போது ஆப்பிரிக்க நாடுகளில் 11 நாள் சுற்றுப்பயணம் மேற்கொண்டுள்ள போப் லியோ XIV, கேமரூன் (Cameroon) நாட்டின் பாமெண்டா (Bamenda) நகரில் உள்ள செயின்ட் ஜோசப் கதீட்ரலில் உரையாற்றினார். அப்போது, போர் தொடுப்பதற்காக மதத்தைப் பயன்படுத்துபவர்களை அவர் மிகக் கடுமையாகச் சாடினார்.
“தங்கள் ராணுவ, பொருளாதார மற்றும் அரசியல் ஆதாயங்களுக்காக மதத்தையும் கடவுளின் பெயரையும் தவறாகப் பயன்படுத்துபவர்களுக்கு ஐயோ கேடு! அவர்கள் புனிதமானவற்றை இருளிலும் அழுக்கிலும் தள்ளுகிறார்கள்,” என்று அவர் ஆவேசமாகத் தெரிவித்தார்.
உலக நாடுகள் போருக்காகவும் அழிவுக்காகவும் பில்லியன் கணக்கான டாலர்களை வாரி இறைப்பதைக் குறிப்பிட்ட அவர், கல்வி, மருத்துவம் மற்றும் மறுசீரமைப்பு போன்ற ஆக்கப்பூர்வமான பணிகளுக்கு நிதி ஒதுக்கப்படுவதில்லை என்று வேதனை தெரிவித்தார். அமெரிக்க அதிபர் டொனால்ட் டிரம்ப் (Donald Trump)-ன் பெயரை அவர் நேரடியாகக் குறிப்பிடவில்லை என்றாலும், அமெரிக்க-ஈரான் போர் விவகாரத்தில் வத்திக்கான் தொடர்ந்து எடுத்து வரும் நிலைப்பாட்டின் தொடர்ச்சியாகவே இது பார்க்கப்படுகிறது.
ஜே.டி. வான்ஸ் (JD Vance) – போப் இடையே மோதல்
இதற்கிடையில், அமெரிக்க துணை அதிபரும் கத்தோலிக்க மதத்திற்கு மாறியவருமான ஜே.டி. வான்ஸ் , போப் அரசியலில் ஈடுபடாமல் “தார்மீக விவகாரங்களில் மட்டும் கவனம் செலுத்த வேண்டும்” என்று அண்மையில் கூறியிருந்தார். இதற்குப் பதிலடி கொடுக்கும் வகையில் அமெரிக்க கத்தோலிக்க ஆயர்கள் கூட்டமைப்பு (US Conference of Catholic Bishops) போப்பிற்குத் தங்கள் முழு ஆதரவைத் தெரிவித்துள்ளது.
துணை அதிபர் வான்ஸ், கத்தோலிக்க திருச்சபையின் ‘நியாயமான போர்’ (Just War Theory) கோட்பாட்டைத் தவறாகப் புரிந்து கொண்டுள்ளார் என்று ஆயர்கள் சுட்டிக்காட்டியுள்ளனர். அமைதிக்கான அனைத்து முயற்சிகளும் தோல்வியடைந்த பிறகு, தற்காப்பிற்காக மட்டுமே ஆயுதம் ஏந்துவதுதான் முறையானது என்று அவர்கள் விளக்கம் அளித்துள்ளனர்.
டிரம்பின் பதிலடி மற்றும் பழிவாங்கும் நடவடிக்கை?
தி கார்டியன் (The Guardian) செய்திகளின்படி, போப்பின் விமர்சனங்களுக்குப் பதிலளிக்கும் விதமாக டொனால்ட் டிரம்ப் தனது ‘ட்ரூத் சோஷியல்’ (Truth Social) தளத்தில் ஒரு புகைப்படத்தைப் பகிர்ந்துள்ளார். அதில் இயேசு கிறிஸ்து தம்மை அணைத்துக் கொண்டிருப்பது போன்றும், பின்னணியில் அமெரிக்கக் கொடி இருப்பது போன்றும் சித்தரிக்கப்பட்டுள்ளது.
மற்றொரு அதிரடித் திருப்பமாக, மியாமி (Miami) நகரில் கத்தோலிக்க திருச்சபையினால் நடத்தப்பட்டு வந்த தொண்டு நிறுவனத்திற்கான 11 மில்லியன் டாலர் நிதியுதவியை டிரம்ப் நிர்வாகம் திடீரென நிறுத்தியுள்ளது. இந்த நிறுவனம் ஆதரவற்ற புலம்பெயர்ந்த குழந்தைகளுக்கு அடைக்கலம் அளித்து வந்தது. இது போப்பின் விமர்சனங்களுக்கு எதிராக எடுக்கப்பட்ட பழிவாங்கும் நடவடிக்கை என மியாமி ஹெரால்டு (Miami Herald) செய்தி வெளியிட்டுள்ளது.
“அரசியல்வாதியாக நான் என்னைச் கருதவில்லை, ஆனால் அமைதி மற்றும் பேச்சுவார்த்தைக்காகத் தொடர்ந்து குரல் கொடுப்பேன்” என்று போப் லியோ XIV உறுதியாகத் தெரிவித்துள்ளார்.
