கொழும்பு / சென்னை – கச்சத்தீவு இலங்கைக்குச் சொந்தமானது என்பதை இந்திய மத்திய அரசு அந்நாட்டு உச்ச நீதிமன்றத்தில் உறுதிப்படுத்தியுள்ளதாக இலங்கை ஜனாதிபதி அநுர குமார திசாநாயக்க தெரிவித்துள்ளார். வடமேல் மாகாணத்தில் நடைபெற்ற மக்கள் பேரணியொன்றில் உரையாற்றிய அவர், இந்தியாவுடன் இலங்கை கொண்டுள்ள வலுவான இருதரப்பு நல்லுறவை சுட்டிக்காட்டி இக்கருத்தை வெளியிட்டார்.
புதுடெல்லியில் இந்திய உச்ச நீதிமன்றத்தில் கடந்த வாரம் நடைபெற்ற விசாரணையின் பின்னணியில் ஜனாதிபதி திசாநாயக்கவின் இந்த அறிவிப்பு வெளியாகியுள்ளது. 1974 மற்றும் 1976ஆம் ஆண்டுகளில் மேற்கொள்ளப்பட்ட இந்திய–இலங்கை கடல்சார் எல்லை ஒப்பந்தங்களின்படி கச்சத்தீவு இலங்கைக்கு வழங்கப்பட்டதை எதிர்த்து, கடந்த 2008ஆம் ஆண்டு முதல் தொடரப்பட்ட வழக்குகளை நீதிபதிகள் சஞ்சீவ் சச்தேவா மற்றும் சஞ்சய் குமார் ஆகியோர் அடங்கிய அமர்வு விசாரித்து வருகிறது.
இவ்வழக்கு விசாரணையின் போது இந்திய அரசின் தலைமை வழக்கறிஞர் (Attorney General) ஆர். வெங்கடரமணி ஆஜராகி, இந்தியா இலங்கை இடையே மிகச் சிறந்த நட்புறவு நிலவுவதாகவும், கச்சத்தீவு தொடர்பான 1974 மற்றும் 1976 உடன்படிக்கைகளை மீண்டும் மறுபரிசீலனை செய்யும் எண்ணம் இந்திய அரசுக்கு இல்லை என்றும் திட்டவட்டமாகத் தெரிவித்தார். அதேவேளையில், இவ்வொப்பந்தங்களின் அரசியலமைப்புச் சட்ட ஏற்புடைமை குறித்து உச்ச நீதிமன்றம் இறுதித் தீர்ப்பை வழங்கவில்லை; இவ்வழக்கின் அடுத்தகட்ட விசாரணை பிப்ரவரி 2027-க்கு ஒத்திவைக்கப்பட்டுள்ளது.
விசாரணையின் போது கருத்து தெரிவித்த நீதிபதி சஞ்சய் குமார், தமிழக மீனவர்கள் எல்லை தாண்டி இலங்கை கடல் எல்லைக்குள் நுழைவதைத் தடுக்கும் வகையில் இந்திய மத்திய அரசும், தமிழ்நாடு அரசும் அவர்களுக்கு உரிய விழிப்புணர்வை ஏற்படுத்த வேண்டும் என்று அறிவுறுத்தினார். மேலும், இலங்கைக் கடல் பகுதியில் மீன்வளம் பெருகுவதற்கு அங்கு பின்பற்றப்படும் சுற்றுச்சூழல் பாதுகாப்பு நடவடிக்கைகளும் ஒரு காரணமாக இருக்கலாம் என்று நீதிமன்றம் குறிப்பிட்டது.
தமிழகத்தில் எதிர்வரும் தேர்தல்கள் மற்றும் அரசியல் விவாதங்களில் கச்சத்தீவை மீட்க வேண்டும் என்ற கோரிக்கைகள் அவ்வப்போது தீவிரமடைந்து வரும் சூழலில், ஜனாதிபதி திசாநாயக்கவின் இந்த உரை முக்கியத்துவம் பெறுகிறது. தமிழ்நாடு மீனவர்கள் எல்லை தாண்டி வந்து தடைசெய்யப்பட்ட இரட்டைமடி வலைகளைக் கொண்டு (bottom trawling) ஆழ்கடல் மீன்பிடிப்பில் ஈடுபடுவதால், வடக்கு மாகாண ஈழத் தமிழ் மீனவர்களின் வாழ்வாதாரமும் கடல்சார் சூழலும் கடுமையாகப் பாதிக்கப்படுவதாக இலங்கைத் தரப்பில் தொடர்ந்து குற்றச்சாட்டுகள் முன்வைக்கப்பட்டு வருகின்றன.
தனது உரையில் பிராந்திய பாதுகாப்பு குறித்தும் பேசிய ஜனாதிபதி அநுர குமார திசாநாயக்க, இந்தியாவின் தேசியப் பாதுகாப்புக்கு அச்சுறுத்தல் ஏற்படும் வகையில் இலங்கையின் வான்பரப்பு, தரைப்பகுதி அல்லது கடல் எல்லைகள் எவ்வித வெளிச் சக்திகளாலும் பயன்படுத்தப்பட அனுமதிக்கப்பட மாட்டாது என்ற கொழும்பின் உறுதியான நிலைப்பாட்டை மீண்டும் வலியுறுத்தினார்.
தகவல் தொகுப்பு & செய்தி ஆசிரியர் பிரிவு.
