கொழும்பு – 25 அக்டோபர் 2026: இலங்கை அரசாங்கத்தால் முன்மொழியப்பட்டுள்ள புதிய பயங்கரவாத எதிர்ப்புச் சட்ட வரைவானது, மனித உரிமைகளுக்குக் கடுமையான அச்சுறுத்தலை ஏற்படுத்துவதோடு, அதிகார துஷ்பிரயோகங்களுக்கு மீண்டும் பரந்த அளவில் வழியமைக்கும் அபாயத்தைக் கொண்டுள்ளதாக சர்வதேச மனித உரிமை அமைப்பான சர்வதேச மன்னிப்புச் சபை (Amnesty International) தனது புதிய சட்ட ஆய்வறிக்கையில் சுட்டிக்காட்டியுள்ளது.
பல தசாப்தங்களாக சிறுபான்மைத் தமிழ் மக்கள் மீதும், அரச எதிர்ப்பாளர்கள் மீதும் அடக்குமுறைக் கருவியாகப் பயன்படுத்தப்பட்டு வந்த கொடூரமான பயங்கரவாதத் தடைச் சட்டத்தை நீக்குவதற்குப் பதிலாக, ‘அரசினைப் பயங்கரவாதத்திலிருந்து பாதுகாக்கும் சட்டமூலம்’ (Protection of the State from Terrorism Bill) என்ற பெயரில் இப்புதிய சட்ட வரைவு கொண்டுவரப்படுகின்றது. கடந்த 2025-ஆம் ஆண்டின் இறுதியில் வெளியிடப்பட்ட வெள்ளையறிக்கையை விடவும் சில நடைமுறை மாற்றங்கள் இதில் உள்வாங்கப்பட்டிருந்தாலும், பயங்கரவாதம் குறித்த வரைவிலக்கணம் இன்னமும் மிகவும் விரிவானதாகவும் தெளிவற்றதாகவும் காணப்படுவதாக அந்த அறிக்கை விவரிக்கிறது.
இச்சட்டமூலம் கடந்த அக்டோபர் 6 அன்று நாடாளுமன்றத்தில் சமர்ப்பிக்கப்பட்டு, தற்போது அதன் அரசியலமைப்பு ஏற்புடைமையை ஆராய்வதற்காக உயர் நீதிமன்றத்தின் பரிசீலனையில் வைக்கப்பட்டுள்ளது. நீதிமன்றத்தின் முடிவைத் தொடர்ந்து வரும் வாரங்களில் இது நாடாளுமன்ற விவாதத்திற்கு எடுத்துக் கொள்ளப்படவுள்ளது. சிறுபான்மையினர் மற்றும் மனித உரிமைச் செயற்பாட்டாளர்களை ஒடுக்குவதற்காக நீண்டகாலமாக துஷ்பிரயோகம் செய்யப்பட்ட ஒரு சட்டத்தை மாற்றியமைக்கும் போது, அரசிற்கு மீண்டும் அடக்குமுறைக் கருவிகளை வழங்காமல், மனித உரிமைகளைப் பாதுகாக்கும் வலுவான கட்டமைப்பு உறுதி செய்யப்பட வேண்டும் என சர்வதேச மன்னிப்புச் சபையின் தெற்காசியப் பிராந்திய பணிப்பாளர் ஸ்மிருதி சிங் (Smriti Singh) வலியுறுத்தியுள்ளார்.
இப்புதிய சட்டமூலத்தின் கீழ், குற்றம் சாட்டப்படாமலேயே ஒரு நபரை ஓராண்டு காலம் வரை தடுத்து வைக்கவும்,அதைத் தொடர்ந்து வழக்கு விசாரணைக்கு முன்னரான காவலில் மேலும் ஓராண்டு வரை வைக்கவும் அதிகாரம் வழங்கப்பட்டுள்ளது. அதாவது, நீதிமன்ற விசாரணை தொடங்குவதற்கு முன்பே ஒரு நபர் இரண்டு ஆண்டுகள் வரை தன்னிச்சையாகத் தடுத்து வைக்கப்படலாம் என்பது, நியாயமான விசாரணையைப் பெறுவதற்கான சர்வதேச அடிப்படை உரிமையை முற்றாக மீறுவதாக அமைகின்றது என்று மனித உரிமை நிபுணர்கள் சுட்டிக்காட்டுகின்றனர்.
மேலும், ஜனநாயகப் போராட்டங்கள், மக்கள் கருத்து வெளிப்பாடுகள், தொழிற்சங்க நடவடிக்கைகள் மற்றும் மனிதாபிமான உதவிகள் போன்றவற்றை பயங்கரவாதச் செயல்களிலிருந்து திட்டவட்டமாக விலக்குவதற்கான தெளிவான சட்டப் பாதுகாப்புகள் இதில் இணைக்கப்படவில்லை. அதேபோன்று, முப்படைகளுக்கும் கடலோரக் காவல்படைக்கும் பொலிஸ் அதிகாரங்களை வழங்குதல், பாதுகாப்பு அமைச்சரால் நியமிக்கப்படும் சுயாதீனமற்ற ஆய்வுக் குழுக்கள், மற்றும் சட்டமா அதிபரின் அனுமதியுடன் வழக்குகளை 20 ஆண்டுகள் வரை ஒத்திவைக்க வழிவகுக்கும் ஏற்பாடுகள் ஆகியவை சட்டத்தின் ஆட்சிக்கும், பாதிக்கப்பட்டவர்களுக்கான நீதிக்கும் பாரிய பின்னடைவாக அமையக்கூடும் என எச்சரிக்கப்பட்டுள்ளது.
பயங்கரவாதத் தடைச் சட்டத்தை (PTA) முற்றாக நீக்குவதாக வாக்குறுதி அளித்த போதிலும், நடப்பு நிர்வாகத்திலும் அதன் பயன்பாடு தொடர்வதாக ஐக்கிய நாடுகள் மனித உரிமைகள் ஆணையாளர் அலுவலகத்தின் (OHCHR) தரவுகள் வெளிப்படுத்துகின்றன. எனவே, தற்போது நாடாளுமன்றத்தில் உள்ள இப்புதிய வரைவை உடனடியாகத் திரும்பப் பெற்று, ஐக்கிய நாடுகளின் சிறப்பு அறிக்கையாளர்களால் வழங்கப்பட்ட சர்வதேச மனித உரிமை அளவுகோல்களுக்கு அமைய சட்டத்தில் முழுமையான சீர்திருத்தங்களை மேற்கொள்ள வேண்டும் என சர்வதேச மன்னிப்புச் சபை இலங்கை அரசை வலியுறுத்தியுள்ளது.
